Sejħa għal applikazzjonijiet biex jitwettqu d-dmirijiet bħala Uffiċjal Eżekuttiv (Makerspace and Business) fl-Aġenzija Kulturali għall-Belt Valletta

03/05/2024

Permess ta’ Jobsplus Nru 80/2023

Sejħa għal applikazzjonijiet biex jitwettqu d-dmirijiet bħala Uffiċjal Eżekuttiv (Makerspace and Business) fl-Aġenzija Kulturali għall-Belt Valletta (VCA)

Nomenklaturi li jindikaw is-sess maskili jinkludu wkoll is-sess femminili

1. Il-VCA hija entità tal-Gvern li għandha l-kompitu li ssostni u ssaħħaħ il-ħajja kulturali vibranti tal-belt kapitali permezz tal-ħolqien ta’ programm annwali ta’ avvenimenti kreattivi żviluppati b’kollaborazzjoni ma’ artisti u Organizzazzjonijiet Kulturali Pubbliċi oħra. Bħala l-legat tal-Fondazzjoni Valletta 2018, il-VCA tara wkoll li żżomm standards ta’ eċċellenza fil-koordinazzjoni u l-organizzazzjoni ta’ avvenimenti kulturali fil-belt, filwaqt li tinkoraġġixxi l-aċċess u l-parteċipazzjoni minn udjenza diversa.

1.1. L-Aġenzija qed tfittex applikazzjonijiet minn kandidati xierqa biex iwettqu dmirijiet bħala Uffiċjal Eżekuttiv (Makerspace and Business) kif imsemmi hawn taħt. Din il-kariga hija fuq bażi full-time u hija soġġetta għal perjodu ta’ prova ta’ tnax (12)-il xahar.

2. L-Uffiċjal Eżekuttiv (Makerspace and Business) li jifforma parti mill-Valletta Design Cluster fi ħdan l-Aġenzija Kulturali għall-Belt Valletta se jkun qed jaħdem taħt is-superviżjoni tal-Kap tal-Valletta Design Cluster u s-CEO.

Id-dmirijiet ewlenin tal-Uffiċjal Eżekuttiv (Makerspace and Business) huma:

• Li jappoġġa lill-Kap tal-VDC fil-ġestjoni, il-koordinazzjoni, is-sorveljanza u t-tmexxija ta’ kuljum ġenerali tal-Makerspace fil-VDC.
• Li jappoġġja lill-Kap tal-VDC fl-implimentazzjoni tal-Istrateġija ta’ Riċerka u Innovazzjoni tal-VDC u, jikkoordina u jwettaq programm ta’ inizjattivi ffukat fuq l-użu tar-riżorsi tal-Makerspace, bil-għan li tiġi żgurata esperjenza koerenti, effettiva u arrikkita għall-utenti;
• Li jiżviluppa Proċeduri Operattivi Standard għall-Makerspace fil-VDC f’kollaborazzjoni mal-maniġment u f’konsultazzjoni mal-konsulenti esperti rilevanti, bil-ħsieb li tiġi pprovduta gwida ċara għall-maniġment, l-utenti u l-membri, u b’enfasi fuq aċċess ċar u linji gwida għall-użu, regolamenti ċari dwar is-saħħa u s-sikurezza, u komunikazzjoni ċara tal-istess lill-kategoriji kollha ta’ utenti.
• Li jwettaq l-operazzjonijiet ta’ kuljum fi ħdan il-Makerspace fil-VDC b’koordinazzjoni mal-maniġment u jiżgura li jsir it-tindif, il-manutenzjoni, it-tiswijiet u l-provvista ta’ oġġetti konsumabbli u jara li jinżammu l-istandards u l-istat ġenerali tat-tħaddim tat-tagħmir, l-għodod u l-faċilitajiet kollha fil-Makerspace f’kundizzjoni eċċellenti.
• Li jiġi żgurat li l-aċċess għall-Makerspace fil-VDC jiġi pprovdut fuq il-bażi ta’ kriterji ċari marbuta mal-istatus tal-utenti tal-bidu, intermedji u avvanzati, f’koordinazzjoni mal-maniġment.
• Li jgħin lill-maniġment jiżviluppa u jimplimenta programm ta’ sessjonijiet ta’ induzzjoni għall-utenti u l-membri interessati fil-Makerspace u jiżgura li dawn il-korsijiet isiru fuq bażi regolari matul is-sena.
• Li jissorvelja proġetti mwettqa fil-Makerspace u jassisti lill-utenti permezz ta’ mentoring fit-twettiq ta’ proġetti ta’ riċerka inkluż l-iskedar ta’ ħin u riżorsi awtomatiċi.
• Li jiżgura li r-riżorsi meħtieġa għall-utenti, il-maniġment u fornituri oħra ta’ servizzi jkunu disponibbli meta jużaw il-Makerspace fil-forniment ta’ korsijiet, sessjonijiet ta’ konsulenza, workshops, żjarat ta’ studju, u attivitajiet u inizjattivi oħrajn li jkunu jeħtieġu jużaw il-faċilitajiet tal-Makerspace fil-VDC;
• Li jiżgura li fir-rigward tal-kwistjonijiet kollha relatati mal-Makerspace jinżamm mezz miftuħ ta’ komunikazzjoni mal-fornituri tas-servizzi impenjati mill-VDC biex jipprovdu kontribut dwar ir-riċerka u l-innovazzjoni, u biex jikkontribwixxu għall-proċessi rilevanti permezz ta’ kontributi strateġiċi, tekniċi u prattiċi, kif meħtieġ, b’mod partikolari fl-oqsma tal-fabbrikazzjoni diġitali, ir-robotika, id-disinn interattiv, il-materjali u l-innovazzjoni bbażata fuq it-teknoloġija;
• Li jikkoordina, u jservi bħala l-persuna ewlenija ta’ referenza fi ħdan it-tim tal-VDC, għall-kwistjonijiet kollha relatati mal-Makerspace, inkluż il-koordinazzjoni mal-bqija tat-tim bil-ħsieb li jassisti fit-twettiq tal-missjoni tal-Valletta Design Cluster, liema kompitu għandu jinkludi, fost l-oħrajn, laqgħat interni u mal-partijiet interessati, laqgħat mal-membri, konsultazzjonijiet, iż-żamma ta’ databases u materjal ta’ referenza marbut mal-Makerspace, l-utenti u l-operazzjonijiet tiegħu, u inizjattivi u avvenimenti oħra marbuta mal-programm iċċentrat fuq l-utent tal-VDC.
• Li jikkoordina l-ipprogrammar tal-VDC mat-tim tal-maniġment, speċjalment mal-uffiċjali responsabbli għall-ipprogrammar u l-involviment tal-komunità, bil-għan li l-post isir aċċessibbli u sikur għal kulħadd.
• Li jassisti fl-implimentazzjoni ta’ programm pedagoġiku u ta’ għarfien li jiffoka fuq ir-riżorsi tal-VDC, inkluż fil-promozzjoni ta’ tali programm mal-utenti fil-mira, il-membri u l-benefiċjarji rilevanti.
• Li jikkontribwixxi għall-ipprogrammar, l-għarfien, il-maniġment u l-operazzjonijiet fuq is-sit ġenerali tal-VDC, billi jattendi laqgħat tal-maniġment u jikkontribwixxi għar-riċerka, l-inizjattivi ta’ għarfien, il-proġetti (nazzjonali u internazzjonali), u l-kollaborazzjoni mal-membri, il-partijiet ikkonċernati u sħab oħra biex tiġi żgurata l-implimentazzjoni b’suċċess tal-istess;
• Jassisti fil-bini tal-komunità tal-proġett u fl-isforzi ta’ netwerking, fil-livelli lokali, nazzjonali u internazzjonali, u jappoġġja u jiżviluppa rabtiet u relazzjonijiet mad-diversi partijiet interessati involuti fil-proġett.
• Li jkun konxju b’mod attiv tal-kollaborazzjonijiet u l-interazzjonijiet kollha li l-VDC għandu jiżviluppa ma’ diversi msieħba, u li jipproponi u jassisti fl-iżvilupp ta’ sħubijiet u kollaborazzjonijiet ġodda u kontinwi b’saħħithom u li jagħtu l-frott, b’enfasi fuq ir-rwol ta’ Makerspace u r-riżorsi li jipprovdi;
• Li jirrappreżenta lill-VDC f’fora u laqgħat nazzjonali u internazzjonali u li jikkontribwixxi għal tali fora u laqgħat, taħt il-gwida tal-Kap tal-VDC;
• Li jippjana u jikkontribwixxi għall-prijoritajiet strateġiċi tal-VDC, f’termini ta’ attività ta’ promozzjoni tad-disinn, inizjattivi relatati mal-edukazzjoni, appoġġ għall-bidu ta’ negozju, sforzi ta’ internazzjonalizzazzjoni, u inizjattivi relatati ta’ sapport u kollaborazzjoni mal-komunità u l-prattikanti tad-disinn ibbażati f’Malta.
• Li jassisti lill-Kap tal-VDC fil-monitoraġġ, fir-rappurtar, u fl-azzjonijiet ta’ segwitu relatati marbuta mal-operazzjonijiet tal-Makerspace, kif ukoll li jikkomunika ma’ kwalunkwe entità nazzjonali u Ewropea rilevanti f’termini ta’ monitoraġġ, rapportar u aġġornamenti tal-proġetti u feedback ieħor mitlub;
• Iwettaq ta’ riċerka kif assenjat mill-Kap tal-VDC u jagħti rakkomandazzjonijiet xierqa.
• Iwettaq kwalunkwe dmir ieħor kif jista’ jiġi assenjat mis-CEO tal-VCA jew mir-rappreżentant tiegħu/tagħha.

3. Is-salarju marbut mal-kariga ta’ Uffiċjal Eżekuttiv (Makerspace and Business) se jkun €28,822 fis-sena fil-Grad 5 fi ħdan l-Istruttura tal-Klassifikazzjoni u s-Salarju tal-Organizzazzjonijiet Pubbliċi tal-Kultura b’żieda annwali ta’ €531 sa massimu ta’ €32,008 (fl-2024).

Il-kandidat magħżul se jkun intitolat għal Disturbance Allowance sa massimu ta’ 15 % fis-sena. Barra minn hekk, fil-pakkett finanzjarju huwa inkluż Performance Bonus sa massimu ta’ 10 % fis-sena.

4. L-applikanti eliġibbli se jiġu intervistati minn Bord tal-Għażla biex jivvaluta l-adegwatezza tagħhom sabiex iwettqu d-dmirijiet imsemmija hawn fuq.

4.1. Kwalifika ta’ Masters fil-Livell 7 tal-MQF (soġġetta għal minimu ta’ 60 kreditu ECTS/ECVET, jew ekwivalenti, fir-rigward ta’ programmi li jibdew minn Ottubru 2008) f’suġġett relatat mad-Disinn/Teknoloġija/Arkitettura/Inġinerija, jew kwalifika komparabbli relatata;

jew

Kwalifika ta’ Baċellerat fil-Livell 6 tal-MQF (soġġetta għal minimu ta’ 180 kreditu ECTS/ECVET, jew ekwivalenti, fir-rigward ta’ programmi li jibdew minn Ottubru 2003) f’suġġett relatat mad-Disinn/Teknoloġija/Arkitettura/Inġinerija, jew kwalifika komparabbli relatata, flimkien ma’ sena (1) esperjenza ta’ xogħol rilevanti.

4.2. Il-kwalifiki u l-esperjenza mitluba jridu jkunu appoġġjati minn ċertifikati u/jew testimonjanzi, li l-kopji tagħhom għandhom jiġu mehmuża mal-applikazzjoni jew jintbagħtu separatament lill-Kap tal-Maniġment tar-Riżorsi Umani fl-Aġenzija Kulturali għall-Belt Valletta, Exchange Buildings, Triq ir-Repubblika, il-Belt Valletta jew permezz ta’ email fuq hr@vca.gov.mt sa mhux aktar tard mid-data u l-ħin tal-għeluq.

4.3. Iċ-ċertifikati oriġinali u/jew it-testimonjanzi għandhom jiġu prodotti b’mod invarjabbli għall-verifika fl-intervista.

5. Persuni rreġistrati mal-Kummissjoni Nazzjonali għall-Persuni b’Diżabilità (NCPD) jistgħu jingħataw akkomodazzjoni raġonevoli skont is-Sezzjoni 7 tal-Att dwar l-Opportunitajiet Indaqs (Persuni b’Diżabilità) (il-Kapitolu 413 tal-Liġijiet ta’ Malta), anke jekk ma jissodisfawx bis-sħiħ ir-rekwiżiti għal din il-kariga, sakemm ikunu jistgħu jwettqu, essenzjalment, id-dmirijiet relatati mal-kariga li għaliha tkun saret l-applikazzjoni.

5.1. Ir-rappreżentazzjonijiet f’termini ta’ din il-klawżola għandhom jiġu mehmuża mal-formola tal-applikazzjoni u appoġġjati b’dokumenti rilevanti li jridu jinkludu wkoll evidenza dokumentarja tar-reġistrazzjoni mal-NCPD. Għandhom jingħataw ġustifikazzjonijiet motivati biex jissostanzjaw in-nuqqas ta’ rekwiżiti ta’ eliġibbiltà sħaħ u għaliex il-kunsiderazzjonijiet motivati huma ħaqqhom li jingħataw.

5.2. Il-korrispondenza kollha għandha tiġi indirizzata lill-entità riċeventi u tiġi kkupjata lill-NCPD.

6. L-applikazzjonijiet appoġġati mid-dokumentazzjoni meħtieġa, li għandha tinkludi ittra ta’ motivazzjoni, Curriculum Vitae dettaljata, u fejn applikabbli Formola ta’ Rekord tas-Servizz u tal-Leave (GP 47), għandhom jaslu għand il-Kap tal-Maniġment tar-Riżorsi Umani, bl-idejn jew bil-posta fuq L-Aġenzija Kulturali tal-Belt Valletta, Exchange Buildings, Triq ir-Repubblika, il-Belt Valletta sa mhux aktar tard minn nofsinhar (Ħin tal-Ewropa Ċentrali) tas-17 ta’ Mejju 2024. Fil-każ tal-impjegati fis-settur pubbliku, dawn għandhom jippreżentaw ir-rekords tal-leave imħallas/leave mhux imħallas/leave tal-mard tagħhom għall-aħħar erba’ (4) snin, inkluż kwalunkwe rekord ta’ kwalunkwe azzjoni dixxiplinarja li setgħet ittieħdet (fin-nuqqas ta’ tali rekords ikun mifhum li qatt ma ttieħdet azzjoni dixxiplinarja). Kopji skennjati tal-applikazzjoni u d-dokumentazzjoni rilevanti mibgħuta elettronikament fuq hr@vca.gov.mt huma aċċettabbli.

6.1. L-applikazzjonijiet li jaslu jiġu kkonfermati b’riċevuta.

7. L-uffiċjal magħżul ikun meħtieġ jiffirma għal dan l-impjieg li jfisser l-impenn tiegħu għall-inkarigu li għalih ikun intgħażel.