Dan l-avveniment bit-titlu *Bibi … and Bibi Bibi … and Bibi Bibi Bibi*, li jifforma parti mill-programm ta’ The Strada Stretta Concept taħt id-direzzjoni artistika ta’ Giuseppe Schembri Bonaci, ser isir fl-20 ta’ Jannar 2022. Il-prestazzjoni tibda fit-20.00 f’The Splendid fi Strada Stretta, il-Belt Valletta.
Il-laqam ‘Bibi’ mhuwiex biss dak ta’ familja, iżda wieħed li jirrappreżenta wirt mużikali ta’ għexieren ta’ snin. *Bibi … and Bibi Bibi … and Bibi Bibi Bibi *jgħaqqad it-talenti tal-aħwa Joe u Pawlu, flimkien ma’ iben Joe, Gilbert. Il-familja, li l-għeruq tagħha huma mill-Belt Valletta, tirrikonoxxi li l-wirt mużikali tagħha ġej minn missierhom u n-nannu tagħhom li kienu jdoqqu fi Strada Stretta fl-aqwa tagħha. It-trio se jkun qed jesegwixxi kanzunetti klassiċi bi strumenti li jvarjaw mill-perkussjoni sal-pjanu u l-armonika. Dawn is-siltiet klassiċi, li ġejjin mis-snin 50 u 60, oriġinarjament indaqqu minn missier Joe u Pawlu, li taw lill-familja l-laqam inizjali tagħha u taw bidu lill-wirt mużikali tagħhom.
Id-dħul huwa b’xejn, iżda important li ssir prenotazzjoni. Jekk jogħġbok ibbukkja post billi tikkuntattja lil info@vca.gov.mt jew iċċempel fuq +356 2124 2018. Jekk jogħġbok innota li minħabba s-sitwazzjoni attwali, dawk kollha li jattendu għandhom ikunu mlaqqma għal kollox u għandhom jilbsu maskra u jżommu d-distanza soċjali l-ħin kollu. Iċ-ċertifikati tat-tilqim jiġu skennjati mad-dħul. Aktar tagħrif dwar l-avveniment jista’ jinstab fuq il-paġni ta’ The Strada Stretta Concept u l-Aġenzija Kulturali għall-Belt Valletta fuq Facebook.
