Jason Micallef huwa ċ-Chairman tal-Aġenzija Kulturali għall-Belt Valletta. Huwa stabbilixxa ruħu fis-settur tal-midja lokali minn età żgħira, u pproduċa programmi popolari tat-televiżjoni kulturali u soċjali tul snin twal fuq TVM, l-istazzjon tax-xandir nazzjonali PBS. Is-Sur Micallef kellu karriera politika attiva ħafna. Daħal fil-ħajja pubblika ta’ 30 sena meta kkontesta l-ewwel rawnd ta’ elezzjonijiet tal-Gvern Lokali fl-1994 u ġie elett bħala Kunsillier Lokali fl-ewwel Kunsill Lokali tal-Mosta, kariga li żamm għal 10 snin konsekuttivi. Huwa ġie vvutat għall-kariga ta’ Segretarju Ġenerali tal-Malta Labour Party (PL), kariga li okkupa bejn l-2003 u l-2009. Aktar tard inħatar Chairman Eżekuttiv ta’ ONE Productions Ltd. Taħt il-mandat tiegħu, ONE Radio u ONE TV għaddew minn proċess ta’ ristrutturar, li stabbilixxa ż-żewġ stazzjonijiet bħala l-aktar stazzjon privat tar-radju u tat-TV popolari mal-udjenzi Maltin. F’Mejju 2013 inħatar Chairman tal-Fondazzjoni Valletta 2018 responsabbli tal-Kapitali Ewropea tal-Kultura 2018 f’Malta, rwol li okkupa sa tmiem il-proġett tal-Kapitali Ewropea tal-Kultura. Matul dan iż-żmien, il-Fondazzjoni żviluppat l-aktar Programm Kulturali varjat u estensiv tal-pajjiż li kien jikkonsisti f’aktar minn 100 proġett u 400 avveniment minn varjetà ta’ dixxiplini. Kien strumentali fit-tlestija ta’ diversi siti ta’ wirt kulturali biex tiġi riġenerata l-belt kapitali għal Valletta 2018. L-Aġenzija Kulturali Valletta hija parti mil-legat tal-Fondazzjoni Valletta 2018.
