Catherine Tabone hija l-Uffiċjal Kap Eżekuttiv tal-Aġenzija Kulturali għall-Belt Valletta. Gradwata mill-Universitajiet ta’ Malta u Cambridge, matul is-snin okkupat diversi karigi maniġerjali fi ħdan l-Amministrazzjoni Pubblika ta’ Malta u kienet ukoll kuratriċi tal-Mużew Nazzjonali tal-Etnografija.
Is-Sa Tabone inħatret Direttur għall-Kultura fl-2013 bir-responsabbiltà li tipprovdi politika, direzzjoni u pariri dwar l-arti, il-wirt, u l-awdjo-viżiv. F’dan ir-rwol, hija kienet involuta direttament fil-laqgħat kollha relatati ma’ dawn l-oqsma li saru bħala parti mill-Presidenza ta’ Malta tal-Kunsill tal-Unjoni Ewropea. Barra minn hekk, mexxiet ir-ratifika ta’ Malta tal-Konvenzjoni tal-UNESCO għas-Salvagwardja tal-Wirt Kulturali Intanġibbli u mexxiet inizjattivi ta’ kollaborazzjoni storiċi ta’ livell għoli bejn Malta u s-Santa Sede. Aktar reċentement, okkupat il-kariga ta’ Direttur Eżekuttiv fil-Fondazzjoni Valletta 2018, li kienet responsabbli mill-implimentazzjoni tal-inizjattiva tal-Kapitali Ewropea tal-Kultura f’Malta.
Is-Sinjura Tabone hija riċerkatriċi ppubblikata u kienet, għal ħafna snin, membru tal-Bord tal-Fakultà tal-Arti fl-Università ta’ Malta. Bħalissa tagħmel parti minn diversi Bordijiet u Kumitati relatati maċ-ċittadinanza kif ukoll mal-wirt kulturali u naturali. Is-Sa Tabone hija wkoll attiva f’NGO lokali li tippromwovi l-valorizzazzjoni ta’ siti storiċi.
