Ibbażat fil-Belt Valletta, dan il-ġnien, ispirat mill-ġnien tal-kunvent ta’ Santa Katerina fi Triq ir-Repubblika, huwa antik u mimli sigrieti. Flimkien, se nesploraw il-pjanti u l-fjuri li jikbru hemm u se niskopru kif jgħixu n-naħal u n-nemel, il-brimb u l-qattusa tal-ġnien. Niltaqgħu wkoll ma’ mara misterjuża li għandha xagħarha magħmul mill-fjuri u ħwejjigha magħmula mill-ilma. Għalfejn tidher daqshekk inkwetata? Qed tersaq qrib tagħna. X’qed titlobna nagħmlu?
Ejja nidħlu fl-istorja biex insiru nafu!
Matul dan il-workshop ta’ 40 minuta (li se jsir fuq Zoom), Giuliana Fenech se tirrakkonta storja u se tiggwida lit-tfal permezz ta’ sett ta’ attivitajiet marbuta mar-rakkuntar tal-istejjer marbuta mal-ġonna u n-natura. Se jintbagħat ktejjeb li jista’ jiġi stampat lit-tfal, li jista’ jinżamm bħala memorja tal-esplorazzjoni tagħhom ta’ dan il-ġnien sigriet. Dawn il-workshops qed isiru bi preparazzjoni għal rappreżentazzjoni finali bħala parti minn dan il-proġett. Din ir-rappeżentazzjoni se ssir ġewwa l-ġnien tal-kunvent ta’ Santa Katerina fi Triq ir-Repubblika, il-Belt Valletta, bejn it-23 u l-25 ta’ Ottubru 2020.
Il-workshops se jsiru fid-dati u l-ħinijiet li ġejjin: 16 ta’ Lulju (10.30am), 17 ta’ Lulju (4pm), 18 ta’ Lulju (10.30am), 19 ta’ Lulju (4pm) u 21 ta’ Lulju (4pm). Biex tipparteċipa, irreġistra fuq https://programs.ligninstories.com/en-secret-garden sal-1 ta’ Lulju 2020.
The Secret Garden hija ko-produzzjoni bejn l-Aġenzija Kulturali għall-Belt Valetta u Lignin Stories.
