Il-ġonna huma mimlijin sigrieti u stejjer. Fl-ogħla fergħat tal-itwal siġar hemm xi ħaġa tleqq u tiddi. Fil-fond f’bir magħmul minn ġebel skur hemm kreatura tiċċaqlaq ’l hawn u ’l hinn u tnewwaħ. Xi ġralu Muxu, il-qattus bla denb, u kif se jsolvi l-misteru tal-ilma li jisparixxi? F’dan il-ġnien kollox qed imut u Muxu jrid jaġixxi malajr.
Se jirnexxielu jsalva d-dar u l-ħbieb għeżież tiegħu?
Ingħaqad magħna f’din l-avventura fantastika u esperjenza l-eċitament li tara l-karattri mill-folklor Malti antik jieħdu l-ħajja u jiffaċċjaw waħda mill-ikbar sfidi ta’ ħajjithom.
Preżentazzjoni live fi Ġnien Laparelli diġà hija eċitanti biżżejjed, iżda biex inkomplu nikkuntentaw lit-tfal Muxu l-qattus se jagħti lill-familji edizzjoni limitata, ta’ ktieb magħmul bl-idejn li juri din id-dinja li dawn il-karattri fantastiċi jgħixu fiha.
Familji u t-tfal tagħhom li jixtiequ jattendu għal dan il-vjaġġ maġiku jistgħu jixtru l-biljetti minn [showshappening.com](https://www.showshappening.com/Valletta-Cultural-Agency/the-secret-garden). Il-biljetti huma €4.50.
Dan l-avveniment huwa kooproduzzjoni bejn l-Aġenzija Kulturali għall-Belt Valletta u Lignin Stories.
Dawk li għandhom iżjed minn 12-il sena jridu jippreżentaw iċ-ċertifikat tat-tilqima fl-entratura filwaqt li t-tfal kollha bejn il-5 u l-11-il sena jridu jippreżentaw test negattiv għall-COVID-19. It-testijiet PCR iridu jittieħdu sa mhux iktar minn 72 siegħa qabel l-avveniment u r-Rapid Tests iridu jittieħdu sa mhux iktar minn 24 siegħa qabel l-avveniment.
