Dan ħabbruh Iċ-Ċermen tal-Aġenzija Kulturali għall-Belt Valletta, Jason Micallef, il-Kap Eżekuttiv Catherine Tabone u ċ-Ċermen tal-Awtorità Maltija għat-Turiżmu Dott. Gavin Gulia.
Wara l-esperjenza tas-sena l-oħra l-Aġenzija Kulturali għall-Belt Valletta se tkompli żżid l-ispettaklu tas-sena l-ġdida b’wirja kbira ta’ logħob tan-nar fil-Port il-Kbir. Dan se jsir appuntament annwali għal-lejlet l-Ewwel tas-Sena u jista’ jitgawda mill-inħawi kollha tal-Port il-Kbir.
Bħal kull sena l-ispettaklu ser jintwera live fuq l-istazzjonijiet kollha lokali mill-10.30pm ‘l quddiem.
Fost il-kantanti matul l-ispettaklu ser ikun hemm John Newman li huwa magħruf għal diversi kanzunetti popolari fosthom “Feel the Love”, “Not Giving In”, “Love Me Again”, “Fire in Me” u “Feelings”. Apparti Newman, f’lejlet l-ewwel tas-sena se tieħu sehem The Palace String Orchestra fejn se jkun hemm prestazzjonijiet minn Aidan, Gaia, Jasmine, Klinsmann, Megan u Ozzylino, filwaqt li se jieħu sehem Debrii. L-avveniment se jkun ippreżentat minn Abel, JD u Martina.
Għalkemm id-dħul huwa bla ħlas, il-biljetti ser ikunu fuq bażi ta’ first come first served u għandhom jinġabru mill-uffiċċju tal-Aġenzija Kulturali għall-Belt Valletta, fi Triq ir-Repubblika, mill-Ħamis 9 ta’ Diċembru wara l-10 ta’ filgħodu. Kull persuna tista’ tiġbor sa massimu ta’ erba’ biljetti. Minħabba r-restrizzjonijiet preżenti biex nikkumbattu l-firxa tal-Covid 19, il-biljetti huma limitati.
Bħalissa qed isiru wkoll id-diskussjonijiet kollha neċessarji mal-Awtorità tat-Turiżmu u mal-Health Depository Unit bil-għan li jiġi żgurat li l-protokolli kollha meħtieġa jkunu qed jiġu segwiti.
Il-[Valletta National New Year’s Eve 2021 Celebrations](https://www.facebook.com/Valletta.NYE) huwa organizzat mill-G7 Events, bl-appoġġ tal-Ftehim ta’ Sħubija għal avvenimenti fuq skala kbira u inizjattiva imniedi mill-Aġenzija Kulturali għall-Belt Valletta Valletta fi ħdan il-Ministeru għall-Wirt Nazzjonali, Kultura u Gvern Lokali. L-avveniment qed jittella’ wkoll bl-appoġġ tal-Awtorità Maltija għat-Turiżmu.
Żur il-[website](https://www.vca.gov.mt/mt) u l-[paġna ta’ Facebook](https://www.facebook.com/vallettaculturalagency) tal-Aġenzija Kulturali għall-Belt Valletta għal aktar informazzjoni.
