Il-komunità kreattiva tal-Valletta Design Cluster tkompli tikber
Kreattivi, disinjaturi, intraprendituri, u freelancers f’dixxiplini u prattiki kreattivi issa jista’ jkollhom bażi operattiva fil-qalba tal-kapitali Maltija, grazzi għall-iskema ta’ sħubija bbażata fl-istudjos tal-Valletta Design Cluster, li issa tinsab miftuħa.
Il-Cluster qed joffri sħubijiet differenti li joffru flessibbiltà skont il-bżonnijiet ta’ kwalunkwe kreattiv jew grupp, permezz ta’ skemi annwali iżda wkoll fuq perjodi iqsar. Flimkien ma’ aċċess esklussiv għal studjo, is-sħubija toffri aċċess għal faċilitajiet moderni, inkluż Makerspace attrezzat b’tagħmir u spazju għal xogħol bl-injam, il-metall, l-elettronika, it-tessuti, stampar 3D, flimkien ma’ riżorsi għall-esplorazzjoni, esperimentazzjoni, u l-ħolqien. Il-Foodspace huwa disponibbli wkoll għal dawk kreattivi fil-kċina, u joffri żewġ kċejjen ta’ livell industrijali għall-esperimentazzjoni u l-prototipi.
NGOs, intrapriżi ġodda, u mikro-intrapriżi li qed jesploraw proġetti fl-arkitettura, il-moda, ir-robotika, jew disinn tal-prodott, fost oħrajn, jistgħu jgawdu minn dak kollu li għandu x’joffri l-Cluster permezz ta’ din is-sejħa għal sħubija, waqt li individwi jistgħu wkoll jingħaqdu biex jaqsmu studjo bejniethom. Hekk kif il-komunità ta’ membri tkompli tikber, bl-istess mod jikbru l-opportunitajiet għall-kollaborazzjoni u l-iskambju ta’ ideat.
Il-Valletta Design Cluster jistieden persuni interessati jattendu għal sessjonijiet miftuħa għal min jixtieq iżur l-istudjos kull nhar ta’ Ħamis wara nofsinhar, sal-għeluq tal-applikazzjonijiet nhar il-Ġimgħa, 30 ta’ Ġunju, f’nofsinhar.
Il-Valletta Design Cluster, li jifforma parti mill-Aġenzija Kulturali għall-Belt, ħerqan biex jilqa’ membri ġodda fil-komunità tiegħu, biex inkomplu nibnu spazju intiż biex irawwem il-kollaborazzjoni u l-esperimentazzjoni fil-prattiki kulturali u kreattivi.
L-applikanti jistgħu jiksbu iktar informazzjoni dwar l-eliġibbiltà, il-proċess ta’ għażla, linji gwida, u kundizzjonijiet fuq din il-paġna. Domandi jistgħu jintbagħtu fuq vdc@vca.gov.mt.
