Il-Valletta Local Food Festival jirritorna b’edizzjoni speċjali mill-Ġimgħa 4 sal-Ħadd 6 ta’ Lulju 2025, mis-7 ta’ filgħaxija sa nofs il-lejl u se jittrasforma l-ġnien tal-Barrakka ta’ Fuq għal tlett ijiem ta’ skoperta kulinari, prodotti lokali, u ċelebrazzjoni komunitarja.
Organizzata b’kollaborazzjoni bejn l-Aġenzija Kulturali għall-Belt Valletta u l-Malta Food Agency, din l-edizzjoni twiegħed li tkun aktar diversa u toffri varjetà aktar minn qatt qabel.
Waqt it-tnedija, il-Ministru għall-Kultura, l-Artijiet u l-Gvern Lokali Owen Bonnici qal, “Il-Valletta Local Food Festival huwa ċelebrazzjoni sabiħa tal-identità u t-talent lokali tagħna. Għal tlett ijiem, il-Barrakka ta’ Fuq se ssir spazju fejn il-familji, il-viżitaturi u l-produtturi lokali jiltaqgħu flimkien biex igawdu flimkien il-kultura fil-qalba tal-Belt Valletta b’aktar minn 25 produttur lokali.”
“Din l-edizzjoni speċjali tagħti spinta lill-ekonomija kreattiva u lill-komunitajiet tagħna, u tkompli ssaħħaħ ir-rabta bejn il-kultura, l-ikel u n-nies. Nawgura suċċess ieħor lil dan il-festival li jdaħħal l-ispirtu tal-valur lokali u b’hekk nibqgħu nagħtu l-ħajja il-Belt Kapitali tagħna,” temm jgħid il-Ministru Bonnici.
Il-Ministru għall-Agrikoltura, is-Sajd u d-Drittijiet tal-Annimali Anton Refalo qal, “Bħala Gvern, nibqgħu kommessi li nippreservaw u nippromovu dan il-wirt agrikolu u kulinari. Dan il-festival jirrifletti b’mod ċar l-investiment li qed isir biex nassiguraw futur sostenibbli għall-biedja u għall-produzzjoni lokali. Kommessi li nkomplu l-ħidma tagħna biex inkomplu nipproteġu u nsostnu l-bdiewa u l-produtturi lokali tagħna.”
Jason Micallef, iċ-Ċermen tal-Aġenzija Kulturali għall-Belt Valletta, tenna: “Din l-edizzjoni speċjali tal-Valletta Local Food Festival fil-Belt Valletta hija ċelebrazzjoni vera tal-identità Maltija. Tonora lill-bdiewa u l-artiġjani tagħna filwaqt li tgħaqqad lin-nies flimkien biex igawdu t-togħmiet tal-passat u tal-preżent f’wieħed mill-aktar spazji pubbliċi impressjonanti tal-Belt Valletta.”
Brian Vella, Il-Kap Eżekuttiv tal-Malta Food Agency tenna, “Il-kollaborazzjoni hija fil-qalba tal-missjoni tal-Malta Food Agency, u l-Valletta Local Food Festival huwa eżempju perfett ta’ dan. Din is-sħubija strateġika mal-Aġenzija Kulturali għall-Belt Valletta tgħaqqad flimkien l-ikel u l-kultura biex tirrifletti tassew dak li verament hu Malti.”
L-ikel huwa parti mill-identità u l-kultura ta’ pajjiżna u permezz ta’ dan il-festival, niċċelebraw ir-rabtiet profondi bejn it-tradizzjonijiet kulinari tagħna u l-wirt kulturali. Aħna kburin b’dak li tirrappreżenta din il-kollaborazzjoni u nħarsu ‘l quddiem biex nilqgħu lill-pubbliku għal dan l-avveniment memorabbli.
Il-Valletta Local Food Festival ta’ din is-sena jgħaqqad flimkien aktar minn 25 produttur lokali, kok, u artiġjan tal-ikel, li jippreżentaw firxa abbundanti ta’ ikel u xorb awtentiku Malti. Minn ġbejniet friski u moqlija, ħalib tan-nagħaġ, kannoli, bigilla, bebbux, u għasel sa mazzola, torti tat-tamal, kirxa, ħobż biż-żejt tradizzjonali, ġamm, u chutneys, kull stand toffri togħmiet bnini u ħafna tradizzjoni. Jintwerew ukoll prodotti innovattivi bħal ħelu infuż bil-bajtra, kannoli mimlija biċ-ċikkulata, melħ bit-togħma, u likuri artiġjanali.
Ewlenija f’din l-edizzjoni se tkun stand immexxija mill-Kok Charles Bone, li fuqha se jkun hemm tisjir live minn koki lokali. Dawn is-sessjonijiet, li jinkludu riċetti ta’ kuljum bi prodotti friski lokali u enfasi fuq il-ħut Malti, għandhom l-għan li jispiraw prattiki ta’ tisjir sostenibbli filwaqt li jiċċelebraw riċetti li ilhom jiġu rispettati.
Il-festival se jinkludi l-parteċipazzjoni ta’ Benna, San Niklaw Farm, il-Koperattiva Maltija tal-Mogħoż u n-Nagħaġ, The Malta Beekeepers’ Association, Lucky Star Bakery, Flavours of Gozo, u ħafna aktar. Numru ta’ għaqdiet kulturali u organizzazzjonijiet taż-żgħażagħ se jservu wkoll platti sustanzjużi bħal laħam tal-ħaruf, il-kirxa u platti oħra tradizzjonali.
Minbarra l-varjetà ta’ ikel, il-festival jippreżenta programm vibranti ta’ divertiment filgħaxija li jinkludi lil Sarah Bonnici u l-band tagħha, Tikka Banda, Klinsmann Trio, u The Dropout DJ Brass Band bis-sehem tal-kantanti Olivia Lewis, Mike Spiteri, Neville Refalo, u Ritienne.
Il-Valletta Local Food Festival 2025 huwa bla ħlas u miftuħ għal kulħadd, u joffri opportunità li mhux ta’ min titlef biex tesperjenza r-rikkezza tal-kultura tal-ikel Malti.
Għal aktar dettalji, żur is-sit elettroniku u l-paġna ta’ Facebook tal-Aġenzija Kulturali għall-Belt Valletta.
