Waqt konferenza tal-aħbarijiet fi Pjazza Teatru Rjal, ġie mħabbar ukoll li ser ikun hemm parkeġġ b’xejn fl-MCP Car Park għal min jidħol il-Belt waqt Black Friday, il-Ġimgħa 27 ta’ Novembru, kif ukoll fit-8 u fit-13 ta’ Diċembru u mid-19 ta’ Diċembru sal-1 ta’ Jannar.
Iċ-Chairman tal-Aġenzija Kulturali għall-Belt Valletta, Jason Micallef qal: “Fiċ-ċirkostanzi straordinarji li qed ngħixu fihom, l-Aġenzija Kulturali għall-Belt Valletta, f’rispett sħiħ lejn il-miżuri kollha mid-Dipartiment tas-Saħħa Pubblika, ħasbet biex mill-20 ta’ Novembru – meta ser jinxtgħal id-dawl tal-Milied – sal-aħħar tas-sena, l-ispirtu tal-Milied fil-Belt Valletta ma jmutx. Minkejja r-restrizzjonijiet fl-għażla tal-attivitajiet, l-Aġenzija Kulturali għall-Belt Valletta xorta waħda ħejjiet programm ta’ sensiela ta’ attivitajiet li jvarjaw minn arti performattiva, teatru tat-triq, mużika, korijiet tal-Milied, u fuq kollox, disinn mil-isbaħ ta’ dawl tal-Milied għal Triq ir-Repubblika u Strada Merkanti, u għall-ewwel darba, mal-faċċati kollha ta’ Pjazza San Ġorġ. Ma’ dawn ser ikun hemm ukoll il-Presepju fi Pjazza de Valette u disinn artistiku tan-natività li ser ikun qed jitpoġġa mal-faċċata tal-Main Guard”.
Il-Ministru tat-Turiżmu Julia Farrugia Portelli spjegat kif l-għan tal-Gvern huwa propju li jgħin biex l-industrija tal-Ospitaità u t-Turiżmu tqum fuq saqajha. Huwa propju għalhekk li l-Ministeru qed jagħti s-sostenn sħiħ tiegħu lejn din l-iskema.
Filwaqt li bħalissa bdejna naħsbu x’rigali nistgħu nagħtu, hija stednitna biex din id-darba naħsbu fl-industriji lokali. Hija fakkret kif fil-Belt Valletta hawn diversi postijiet ta’ akkommodazzjoni fosthom lukandi u boutique hotels u ħeġġet lil min is-soltu jqatta l-vaganzi msiefer biex jikkunsidra dawn il-postijiet u ristoranti fil-Belt Valletta u s-servizzi tal-ospitalità five-star, fejn l-atmosfera ser tkun waħda li tixbaħ dik ta’ bliet oħra iżda fejn l-esperjenza tkun tassew unika.
Hija tenniet li l-programm ta’ attivitajiet li ser ikun qed jittella’ mill-Aġenzija Kulturali għall-Belt Valletta, mit-8 ta’ Diċembru ‘l quddiem, joffri diversi opportunitajiet biex wieħed igawdi dawn il-ġranet lill’hinn mil-follol, iżda fejn isib xi ħaġa li tolqot il-gosti ta’ kulħadd.
Il-Ministru responsabbli mill-Arti u l-Kultura, Jose Herrera spjega kif permezz ta’ dawn l-attivitajiet u l-inċentivi għal dawk kollha li ser ikunu qed jidħlu l-Belt, l-Arti u l-kultura qed tkun xprun tal-ekonomija u t-tkabbir soċjali.
Il-Programm tal-Aġenzija Kulturali għall-Belt Valletta ħaseb li mhux biss iżejjen it-toroq u l-pjazez bi dwal spettakolari, iżda ħoloq ukoll avvenimenti żgħar u medji f’diversi postijiet fosthom Pjazza de Valette, Pjazza Ħelsien, Triq ir-Repubblika, Pjazza l-Assedju l-Kbir, Pjazza San Ġorġ, is-Suq u Strada Stretta.
Minkejja li għadejjin minn żminijiet partikolari ħafna, huwa importanti li nkomplu nagħtu s-sostenn tagħna lill-artisti bil-parteċipazzjoni tagħna bħala membri tal-udjenza u li jkomplu jsiru attivitajiet kulturali.
L-Aġenzija Kulturali għall-Belt Valletta qed tieħu ħsieb li ssegwi l-miżuri kollha imposti mid-Dipartiment tas-Saħħa Pubblika u għalhekk wieħed jista’ jgawdi dawn l-avvenimenti matul żmien il-Milied b’moħħu mistrieħ.
