• English
  • Malti
  • Attivitajiet
  • Aħbarijiet
  • Opportunitajiet
  • Blogs
  • Valletta Design Cluster
    • Dwarna
    • Il-Faċilitajiet Tagħna
    • Sir Membru
      • Become a Member
      • Sħubija bbażata fi Studjow
    • Il-Proġetti Tagħna
      • Programmi ta’ Residenza
        • Kollaborazzjoni ma’ Spazju Kreattiv
        • InnovAiR
      • Design4Innovation
      • EIT Urban Mobility RIS Hub Malta
      • Ulysses’ Shelter 3 Spring
  • Strada Stretta
  • Appoġġja lill-VCA
  • Dwarna
  • Ikkuntattjana

Infjorata b’Messaġġ ta’ Tama u Kuraġġ fi Pjazza San Ġorġ

Mil-lum sal-Ħadd li ġej, Pjazza San Ġorġ se twassal messaġġ qawwi ta’ tama u kuraġġ grazzi għall-infjorata sinonima mal-Valletta Green Festival. Din is-sena, madankollu, dan l-avveniment annwali li jittella’ fi żmien ir-Rebbiegħa ħa format ġdid, billi n-nies huma mħeġġa jkomplu josservaw il-miżuri ta' tbegħid soċjali u japprezzaw l-infjorata onlajn, mis-sigurtà ta' djarhom.

Photo Credits: Jonathan Borg (Zigli)

L-Aġenzija Kulturali għall-Belt Valletta ngħaqdet ma’ Skyline Webcams biex tinstalla webcam fuq il-bejt tal-palazz tal-Granmastru għal dan il-għan. Il-pubbliku jista’ jaċċessaha f’kull ħin permezz tal-ħolqa li ġejja: https://www.skylinewebcams.com/en/webcam/malta/malta/valletta/st-george-square-valletta.html jew billi jidħol fuq il-paġna ta’ Facebook tal-Valletta Cultural Agency. Grazzi għal dawn il-webcams, il-pubbliku jista’ wkoll isegwi l-proċess tat-tlestija tal-infjorata, peress li l-webcams huma aċċessibbli l-ħin kollu.

Bit-titlu “Beeodiversity”, l-infjorata ta’ din is-sena hija maħluqa u ddisinjata mill-artista Lisa Marie Kähler. Id-disinn ta’ din is-sena għandu kemm messaġġ ta’ tama f’dawn iż-żminijiet diffiċli li qed ngħixu fihom, kif ukoll messaġġ li jħeġġeġ lin-nies isiru konxji ta’ dak li jhedded il-bijodiversità, it-tema għall-Valletta Green Festival ta’ din is-sena.

L-infjorata ta’ din is-sena mhix biss magħmula minn fjuri, li tħawwlu mill-Environmental Lanscapes Consortium (ELC) qabel il-bidu tal-imxija tal-Covid-19 f’Malta, iżda wkoll minn materjali organiċi u sostenibbli oħra, bħal lumi u qxur tal-ġellewż. Il-punt fokali tad-disinn huwa naħla kbira, li tfakkar fir-rwol importanti li dawn l-insetti għandhom fl-ekosistema tagħna. Il-fjuri li hemm madwarha jirrappreżentaw ir-rwol tan-naħal bħala pollinaturi, rwol ewlieni biex il-pjanti u s-siġar ikunu jistgħu jikbru, filwaqt li joħolqu ikel u kenn għal speċi oħra. Id-disinn tal-infjorata juri wkoll għasafar estinti u iljunfanti żgħar, li jirrappreżentaw it-telf li ġarrabna u li se nġarrbu jekk in-naħal jispiċċaw estinti peress li huma mhedda mit-tniġġis, il-biedja kummerċjali u t-telf tal-abitat. Il-mewġ jirrappreżenta l-ilma li għandu rwol ewlieni fis-sopravivenza tagħna, filwaqt li l-parti miksija bir-ramel tirrappreżenta l-futur tal-ġenerazzjonijiet li jmiss, li ħaqqhom jirtu ambjent b’saħħtu. Il-parti mgħamula mir-ramel fil-qiegħ tad-disinn tirrappreżenta żona ta’ potenzjal, li tissimbolizza kif l-azzjonijiet tagħna jiddeterminaw jekk l-art hux se tibqa’ għerja u nieqsa mill-bijodiversità jew jekk hux se tiffjorixxi bi pjanti u annimali ta’ kull xorta.

Fis-snin ta ’qabel, ħafna mill-fjuri kienu jiġu mogħtija lil membri tal-pubbliku li jżuru l-pjazza waqt kif ukoll fi tmiem il-festival waqt li l-kumplament kienu jerġgħu jintużaw mill-ELC. Din is-sena, sabiex jiġu segwiti r-regoli tad-distanza soċjali, il-pubbliku huwa skoraġġut milli jżur il-pjazza fi tmiem il-festival, billi l-fjuri kollha se jintbagħtu lura lill-ELC biex jintużaw fir-roundabouts madwar il-gżira.

Segwi l-paġna ta’ Facebook tal-Aġenzija Kulturali għall-Belt Valletta għal aktar informazzjoni, u biex issegwi l-live-stream bejn is-7 u l-10 ta’ Mejju.

Agħmel kuntatt magħna:

  • Indirizz
    Valletta Cultural Agency, Exchange Buildings, Triq ir-Repubblika, Il-Belt Valletta
  • Numru tat-Telefon
    +356 2124 2018
  • Email
    info@vca.gov.mt

Żomm ruħek aġġornat.
Abbona għall-Ittraħbar!

** Mhux ser nibagħtulek emails bla bżonn.

back to top
  • Politika dwar il-Protezzjoni tad-Data
  • Dikjarazzjoni dwar l-Aċċessibilità
  • Il-Libertà tal-Informazzjoni
  • Riżorsi
  • Mappa tas-sit

© 2022 – Valletta Cultural Agency. Id-drittijiet kollha riżervati.

Another website by TheWebAlly Logo