Ingħaqad magħna għall-Valletta Green Festival li joffri ġnien fantastiku fi Pjazza San Ġorġ, waħda mill-akbar żoni miftuħa tal-Kapitali.

Il-festival jiftaħ it-Tnejn l-1 ta’ Mejju b’aktar minn 18,000 pjanta ta’ kull varjetà u kulur u l-ġnien jista’ jitgawda sal-Ħadd 7 ta’ Mejju.

L-attivitajiet jibdew mill-Erbgħa 3 ta’ Mejju sal-Ħadd 7 ta’ Mejju mill-10am sat-8pm kuljum u mill-10am sal-10pm il-Ħadd.

L-akbar edizzjoni tal-Valletta Green Festival li qatt ittellgħat testendi minn Pjazza San Ġorġ għal Triq it-Teatru l-Antik, Pjazza Tritoni u diversi toroq u pjazez fil-Belt Valletta. Ejja u ixtri mingħand intraprendituri kreattivi fl-Eko Market mifrux tul Triq it-Teatru l-Antik u jaf tinzertaw flash mob minn Dancel Dance Studio f’diversi toroq u pjazez madwar il-Belt Valletta.

Il-Valletta Green Festival jospita diversi stands minn Ambjent Malta, ERA, EWA (Water Be the Change), Project Green, l-Eco Market, Missio u t-trakk tal-Wasteserv roadshow.

L-EIT Urban Mobility RIS Hub Malta se jippreżenta l-attivitajiet tal-Hub u jintroduċi opportunitajiet attwali u ġodda. Ser tkun ppreżentata wkoll il-Walk Diary, attività favur il-familja mmirata lejn tfal ta’ bejn is-6 u t-12-il sena li tistieden lill-parteċipanti jimxu madwar il-Belt Valletta u jirreġistraw l-esperjenza tagħhom f’djarju. Ser naraw ukoll GoNature, logħba interattiva li tiffoka fuq l-implimentazzjoni ta’ soluzzjonijiet ibbażati fuq in-natura. Il-proġett MOVE for Trees intant jistieden lill-parteċipanti għal inizjattiva ta’ azzjoni kollettiva li tippromwovi attività fiżika u mobilità sostenibbli li permezz tagħha ser jitħawwlu siġar u arbuxelli fl-Iskola Primarja tal-Belt Valletta.

Is-Sibt 6 ta’ Mejju u l-Ħadd 7 ta’ Mejju titilfux l-Eko Market – sinonimu għal bejjiegħa ta’ oġġetti magħmulin bl-idejn, u li huma eko-fiendly u sostenibbli,  fi Triq it-Teatru l-Antik. Stenna varjetà ta ‘prodotti u servizzi għall-adulti u t-tfal fosthom prodotti tas-sbuħija, ġojjelli u oġġetti tal-moda, pitturi, oġetti dekorattivi u ħafna aktar.

Min jidħol il-Belt Valletta s-Sibt filgħodu jaf jinzerta flash mob minn Dancel Dance Studio f’diversi toroq u pjazez madwar il-Belt Valletta, bejn l-10,30am u nofsinhar. F’koreografija ta’ aktar minn 50 żeffien ser titqajjem kuxjenza dwar kwistjonijiet ambjentali.

Pjazza Tritoni

Wasteserv tippreżenta l-kampanja tagħha ‘Separate right, make our future bright’, immirata biex ittejjeb ir-riċiklaġġ u tiġġenera aktar għarfien dwar ir-rimi tal-iskart. Ejja u tgħallem aktar dwar is-separazzjoni xierqa tal-iskart filwaqt li tiltaqa’ mal-maskots. Ir-Roadshow titella’ bejn it-8am u t-8pm l-Erbgħa, il-Ħamis u l-Ħadd b’ħinijiet estiżi sal-10pm il-Ġimgħa u s-Sibt. Il-Mascots se jkunu preżenti mill-4pm sat-8pm il-Ġimgħa, bejn id-9am u nofsinhar u mill-4pm sal-10pm is-Sibt kif ukoll mid-9am sa nofsinhar u mill-4pm sat-8pm il-Ħadd.