Triq Nofsinhar ġiet trasformata f’metamorfosi kkulurita permezz ta’ *Meta l-Baħar Iniggeż*, mill-artist Serhat Gür – installazzjoni fuq skala kbira li tesplora l-konnessjoni bejn l-art, is-soċjetà umana u l-bijodiversità rikka tal-baħar tagħna.
Il-bidla fi Triq Nofsinhar tqanqal il-ħsieb filwaqt li tiċċelebra l-Jum Dinji tal-Oċean u l-importanza li l-baħar għandu fil-ħajja tagħna ta’ kuljum.
Din l-installazzjoni tibni fuq it-tema tal-Valletta Green Festival 2022 – il-protezzjoni tal-ħabitats naturali u l-effett li dan għandu fuq il-flora u l-fawna tal-gżejjer tagħna.
Is-sbuħija tal-bram f’wiċċ l-ilma spiss titqabbel ma’ farfett. Għalkemm il-bram jidhru ħlejjaq sempliċi billi sempliċement jimxu mal-kurrent fil-baħar, uħud mill-ispeċi jistgħu jkunu kumplessi ħafna u ilhom jeżistu għal mill-inqas 600 miljun sena.
